இரண்டாவது ஆட்டத்திலும் இந்தியா வெற்றி!

நியூஸிலாந்துக்கு எதிரான இரண்டாவது இருபது-20 போட்டியிலும் இந்திய அணி வெற்றிபெற்றது.

நியூஸிலாந்துக்குக் கிரிக்கெட் சுற்றுப்பயணம் மேற்கொண்டுள்ள இந்திய அணி, 5 போட்டிகளைக் கொண்ட இருபது-20 தொடரில் விளையாடி வருகிறது.

இதன் முதலாவது போட்டியில் இந்தியா வென்றது.

இந்நிலையில், இரண்டாவது போட்டி இன்று அக்லாந்தில் நடைபெற்றது.

இதில் முதலில் துடுப்பெடுத்தாடிய நியூஸிலாந்து அணி, 20 ஓவர்களில் 5 விக்கெட்டுகள் இழப்புக்கு 132 ஓட்டங்களைச் சேர்த்தது.

பின்னர், 133 ஓட்டங்கள் என்ற வெற்றியிலக்கு நோக்கிக் களமிறங்கிய இந்தியா, ராகுலின் அரைச்சதமும் (57*), ஐயரின் 44 ஓட்டங்களும் கைகொடுக்க, 17.3 ஓவர்களில் 3 விக்கெட்டுகளை மாத்திரம் இழந்து, 135 ஓட்டங்களைச் சேர்த்தது. இதன் மூலம் ஏழு விக்கெட்டுகளால் வென்ற இந்தியா, ஐந்து போட்டிகளைக் கொண்ட தொடரில் 2:0 என்ற கணக்கில் முன்னிலை பெற்றுள்ளது.

ஆட்டநாயகனாக இந்தியாவின் ராகுல் தெரிவானார்.

இரு அணிகளும் மோதும் மூன்றாவது ஆட்டம், எதிர்வரும் 29ஆம் திகதி நடைபெறவுள்ளது.