சிங்கப்பூரில், மின்சைக்கிள்களுக்கான தேவை அதிகரிக்கக்கூடும் என வியாபாரிகள் தெரிவிப்பு..!!!
சிங்கப்பூரில் மின் சைக்கிள்களுக்கான தேவை அதிகரிக்கக்கூடும் என நடமாட்டச் சாதனங்களை விற்கும் வியாபாரிகள் தெரிவித்துள்ளனர். மின்ஸ்கூட்டருக்குப் பதிலாக மின்சைக்கிள்களை அதிக அளவில் பயன்படுத்த உணவு விநியோக ஓட்டுநர்கள் முன் வருவதால் அதற்கு முக்கிய காரணமாகும். எனினும் மின்சைக்கிள் தொடர்பான விற்பனைகளைப் பொறுமையுடன் கையாளவிருப்பதாக வியாபாரிகள் கூறியுள்ளனர்.
புதிய நடமாட்டச் சாதனங்களை கூடிய அளவில் வாங்குவதைத் குறைப்பதுடன் தேவைக்கேற்ப அவற்றை வாங்கி விற்பனை செய்யப்போவதாகவும் அவர்கள் தெரிவித்துள்ளனர். சில கடைகளில் மின்சைக்கிள்களின் விலை சுமார் 1,300 வெள்ளியிலிருந்து 1,500 வெள்ளி வரைக்கும் உள்ளது. சக்கரங்களின் அளவைப் பொறுத்து விலை நிர்ணயிக்கப்படும்.
உணவு விநியோக ஓட்டுநர்களுக்கு உதவ 7 மில்லியன் வெள்ளி மதிப்புள்ள Trade-in Grant எனும் மானியத்தைப் போக்குவரத்து அமைச்சு கடந்த வாரம் அறிவித்துள்ளது. அதையடுத்து ஓட்டுநர்கள் நிலப் போக்குவரத்து ஆணையம் அங்கீகரித்துள்ள நடமாட்டச் சாதனங்களை வாங்கமுடியும். மின்ஸ்கூட்டரைக் கொடுத்து விட்டு மின்சைக்கிளை வாங்க 1,000 வெள்ளி வரை அல்லது சைக்கிளை வாங்க 600 வெள்ளி வரை மானியம் கிடைக்கும்.